Şəkidə kütləvi dava olub, iki nəfər xəsarət alıb.

APA-nın məlumatına görə, iyunun 1-də axşam saat 22:00 radələrində rayonun Çələbixan qəsəbə sakinləri olan 1991-ci il təvəllüdlü Qacay Mürşüd oğlu Məmmədov başın təpə nahiyəsinin kəsilmiş-cırılmış yarası, 1977-ci il təvəllüdlü Elman Kərəm oğlu Rəhimov isə sağ əlin ovucunun kəsilmiş yarası xəsarəti ilə Şəki Rayon Mərkəzi Xəstəxanasına daxil olublar.

Məlum olub ki, Q.Məmmədov, E.Rəhimov və daha iki qəsəbə sakini arasında dava baş verib və bu zaman onlar xəsarət alıb. Q.Məmmədova lazımi tibbi yardım göstərilib, müalicəsi xəstəxananın Əsəb xəstəlikləri şöbəsində aparılır. E.Rəhimovun xəsarəti yüngül olduğundan ona lazımi yardım göstərildikdən sonra evə buraxılıb.

Faktla bağlı Şəki Şəhər-Rayon Polis Şöbəsində araşdırma aparılır.

DiasporPress.az