Sosial şəbəkədə küçədə tapılan 16 yaşlı oğlanın gedəcək yeri olmadığına dair məlumat paylaşılıb.

DiasporPress.az xəbər verir ki, paylaşımı paytaxtın Yasamal rayonu Zahid Xəlilov küçəsində yaşayan uşağın küçədə tək başına ağladığını görərək, ona yardım etmək istəyən vətəndaş edib:

“Uşağı dünən Fatimə adlı xanım anası ilə küçədən keçərkən ağlayarkən görüb. Uşaq deyib ki, anası dünən payaxtın klinikalarından birində koronavirusdan ölüb. Atası da vəfat edib.

Onlar anası ilə tək kirayədə yaşayırmış. Dünən bir qohumugilə gediblər, qapını yaşlı bir qadın açıb və deyib ki, onlar uşağı götürə bilməzlər. Səbəb kimi gəlinin o uşağı himayəyə götürməsini istəmədiyi göstərilib. Ayın sonu da uşağı kirayədə yaşadığı birotaqlı evdən çıxaracaqlar. Evin kirayə pulu üçün 300 manat lazımdır. Oğlanın 16 yaşı var. Mobil telefonu, heç bir əlaqə nömrəsi yoxdur, təkcə kirayə qaldığı evin ünvanı bəllidir”.

Məsələ ilə bağlı Oxu.Az-a açıqlama verən Azərbaycan Uşaqlar Birliyinin sədri Kəmalə Ağazadə bildirib ki, məsələdən xəbərdardırlar.

O bildirib ki, 16 yaşlı uşağın anası koronavirusdan ölməyib:

“Sosial şəbəkələrdə dəqiqləşdirilməmiş məlumat yayıblar.

Araşdırdıq, məlumat öz təsdiqini tapmadı. Qruplarda yığılan pullarınızı da geri tələb edin.

Uşaq yalan danışıb, barı “sizlər” bundan sui-istifadə etməyin. Uşağı görən zaman dərhal polis və ya təcili tibbi yardıma məlumat vermək lazım idi. Nəyə görə pul yığmağa üstünlük verdiniz? Bu işlərdən əl çəkin! Onsuz da insanlar bu dönəmlərdə psixoloji gərginlik keçirir.

Məkrinizi bir kənara qoyun, “mən tapmışam, mən də həll edəcəm” deməklə pul mənimsəməyə çalışmayın!”