“Bu gün Milli Məclisin Mədəniyyət komitəsinin təşkilatçılığı ilə beş komitənin birgə iclası keçiriləcək. İclasda Şuşanın “Mədəniyyət paytaxtı” elan edilməsi haqqında müzakirələr aparılacaq, təkliflər səsləndiriləcək”.

Bu barədə Mədəniyyət komitəsinin sədr müavini Fazil Mustafa məlumat verib. Deputat vurğulayıb ki, sözügedən qanun layihəsinin komitələr arasında müzakirəsi şənbə günü də təşkil edilib və bundan öncə beş komitə birlikdə Şuşaya “Mədəniyyət paytaxtı” statusunun verilməsini dəyərləndirib:

“İclasda təbii olaraq, təkliflərimizi səsləndirəcəyik. Bizim Şuşa ilə bağlı fikirlərimiz fərqlidir. Fikirlərimizin dəyərləndiriləcəyinə inanmıram. Əsasən qanunverici orqana təqdim edilən layihə əsasında təklifləri səsləndirəcəyik. Amma mənim Şuşa ilə bağlı yanaşmam fərqlidir. Hazırda ən mühüm məsələ odur ki, “Mədəniyyət paytaxtı” kimi Şuşanın statusu müəyyən olunsun. Yəqin ki, təkliflərimiz mətbuatda, yaxud başqa platformalarda səslədirildikdə diqqət çəkər”.

Komitənin digər üzvü, deputat Əziz Ələkbərli isə bu gün toplaşacaq dörd komitənin adlarını diqqətə çatdırıb:

“Bu gün Şuşanı müzakirə edəcək komitələr – Hüquq siyasəti və dövlət quruculuğu , İqtisadi siyasət,  sənaye və sahibkarlıq, Regional məsələlər və Mədəniyyət komitələridir.

İclasda  “Azərbaycanın mədəniyyət paytaxtı Şuşa şəhəri haqqında Azərbaycan Respublikasının qanunu” layihəsi müzakirə olacaq. Qanun layihəsinə uyğun olaraq komitə üzvləri  təkliflər irəli sürəcək”.

Diasporpress.az