Milli Məclisin deputatı Tənzilə Rüstəmxanlı avtoqəza nəticəsində ağır beyin əməliyyatı keçirən və uzun müddət komada qalan 15 yaşlı Neftçala sakinini xəstəxanada ziyarət edib.

Diasporpress.az xəbər verir ki, Azərbaycan Respulikası Milli Məclisinin deputatı Tənzilə Rüstəmxanlı avtoqəza nəticəsində ağır beyin əməliyyatı keçirən və uzun müddət komada qalan 2009-cu il təvəllüdlü Nəcəfov Aqili xəstəxanada ziyarət edib.

Millət vəkili yeniyetmənin hazırkı vəziyyəti ilə maraqlanıb, tezliklə sağlamlığına qovuşub təhsilinə davam etməsini arzulayaraq, valideynlərinə onun vəziyyətini daim nəzarətdə saxlayacağını bildirib.

Qeyd edək ki, yeniyetmə Neftçala rayonunun Xolqarabucaq kəndində avtomobil vurması nəticəsində ağır qəzaya düşüb. Qəza nəticəsində 10-cu sinif şagirdi ağır kəllə-beyin travması alıb.

Yaralı Nəcəfov Aqil Bakı şəhərində ağır beyin əməliyyatı keçirib.

15 yaşlı məktəbli 1 ay komada qalıb və hazırda Neftçala rayon xəstəxanasında müalicəsi davam edir.