Açıqlanan rəqəmlər və ayrılan vəsaitləri Sumqayıt bulvarının korrupsiya üçün dibsiz quyu olduğunu deməyə əsas verir.

Belə ki, elan edilən tender müsabiqələrinin qalibi fərdi sahibkar Nigar Rauf qızı Bağırova (VÖEN – 1702068062) olub.

N.Bağırova “Sumqayıt Bulvar” MMC-yə 39 min 550 manat dəyərində adları və miqdarı aşağıda qeyd olunan güllər satacaq.

– Tagetes erecta F1 Antigua – (gül, çiçək açmış) – 5 000 ədəd

– Gazania rigeris F1 Big kiss – (gül, çiçək açmış) – 5 000 ədəd

– Osteospermum Asti – (gül, çiçək açmış) – 5 000 ədəd

– Primula acaulis F1 Primera – (gül, çiçək açmış) – 12 000 ədəd

– Xrezantema – (gül, çiçək açmış) – 4 500 ədəd

– Geran – (gül, çiçək açmış) – 5 000 ədəd

Ötən ilin yayında da “Sumqayıt Bulvar” MMC Nigar Bağırovadan 47 min 950 manat dəyərində ümumilikdə 40 500 ədəd geran, qızılgül, xrezantema, osteopermum və digər adda güllər satın alıb.
Bundan başqa, sahibkar Murad Həsənov da öyən il 112 min manata 1 000 ədəd çinar, 2 000 ədəd leylandi, 600 ədəd iydə, 1 200 ədəd alyandra, 1 500 ədəd zeytun ağacı Z.Fərəcovun bulvarına satıb.
Ümumiyyətlə “Sumqayıt Bulvar” MMC 2019-2021-ci illərdə toplam maliyyə dəyəri 6 milyon manata yaxın olan satınalma müqaviləsi imzalayıb. Sumqayıt bulvarının ümumi sahəsi 100 hektardan çoxdur.
Bulvarda 55 hektar ərazidə yaşıllıq zolağı salınıb. Rəsmi məlumatlarda bildirilir ki, bulvarda bundan əvvəl 160 mindən çox ağac və dekorativ kol, 2 milyon ədəd gül və çiçək əkilib.

Razılaşın ki, bulvar ərazisi nə qədər böyük olsa, genişlənsə də 2 milyon gül kifayət qədər böyük rəqəmdir və şübhəlidir.
Hətta qəbul etsək ki, bu qədər kol-kos, gül alınıb, yenidən hər il yüzminlərlə manatlıq kol-kosun alınması başadüşülən deyil. Belə çıxır ki, əvvəlki ağaclar və güllər məhv olub.
Bu məqamda Alla Puqaçovanın məşhur “Million alıx roz” (Milyon qızılgül) məhşur mahnısı yada düşür. Amma bir fərqlə ki, bundan romantika yox, korrupsiya qoxusu gəlir.

Heç Nyu-Yorkun dünyaca məşhur, hər il milyonlarla insanın ziyarət etdiyi, təxminən eyni uzunluqda olan (4 km) Mərkəzi Parkına bu qədər gül, kol-kos alınmır, xərc çəkilmir.

Sumqayıt Bulvarı isə sanki “qara dəlikdi” və büdcəni kol-kos adı ilə sovurmaq üçün istifadə olunur. Gözəyarı da baxıb görmək olar ki, bulvarda milyonarla gül yoxdur, korrupsiya qoxulu xortumlamadır.

Qeyd edək ki, bir müddət əvvəl Sumqayıt Dənizkənarı Bulvarında tikinti işləri aparan və gördükləri işlərin müqabilində pullarını ala bilməyən, bu üzdən müflis olan bir qrup sahibkar mətbuata şikayət edirdi. Sahibkarlar bildirirdilər ki, Sumqayıt İcra Hakimiyyətinin onlara 1.740. 000 manat borcu var və onlar bu pulları bir ilə yaxındır ki, ala bilmirlər.