Gürcüstanda azərbaycanlıların yığcam yaşadıqları Kvemo Kartli-Borçalı bölgəsində ali məktəblərə qəbul olmaq istəyən gənclərə dəstək layihəsi davam etdirilir.

Diasporpress.az xəbər verir ki, layihə çərçivəsində Marneulidəki “Çay Evi”ndə (Tea House) “İnkişaf və Təhsil Mərkəzi”nin təşkilatçılığı ilə abituriyentlər üçün sınaq imtahanı keçirilib.

Tədbirin təşkilində məqsəd gəncləri milli imtahanlara psixoloji hazırlamaq, onların bilik səviyyəsini yoxlamaq və administrativ qaydalar barədə məlumatlandırmaqdır.

İmtahanda ümumilikdə 60 abituriyent 3 saat ərzində məntiq və riyaziyyat fənləri üzrə bilik və bacarıqlarını sınayıb.

İmtahanda yüksək bal toplayan gənclər “Çay Evi”ndə SOCAR-ın Gürcüstan nümayəndəliyinin dəstəyi ilə həyata keçirilən layihə çərçivəsində universitetlərə hazırlıq kurslarında ödənişsiz təhsil ala biləcəklər.