2020-ci il oktyabrın 18-nə keçən gecə Ermənistan silahlı qüvvələrinin Azərbaycanın Gəncə şəhərinə ballistik raketlərlə hücum etməsi nəticəsində valideynlərini itirən üç yaşlı Xədicə Şahnəzərova ilə bağlı video yayılıb.

Videodan aydın olur ki, Xədicənin əmisi onu qəyyumluğa götürmək istəyib. O, azyaşlının ağlamasına əhəmiyyət vermədən onu qaldığı qohumlarının evindən zorla aparıb.

Məsələ barədə Ailə, Qadın və Uşaq Problemləri üzrə Dövlət Komitəsi ilə əlaqə saxladıq.

Qurumun İnformasiya və analitik araşdırmalar şöbəsinin müdiri Elgün Səfərov məsələ ilə bağlı açıqlamasında bildirib ki, üç yaşlı Xədicə ilə bağlı məsələ nəzarətə götürülüb:

“Xədicə ilə bağlı qanunvericilikdə nəzərdə tutulmuş qaydada uşağın maraqlarına uyğun tədbirlər görüləcək”.

O qeyd edib ki, yayılmış məlumatı nəzərə alaraq azyaşlı Komitə tərəfindən nəzarətə götürülüb.

 Diasporpress.az