Ukrayna Azərbaycanlıları Birləşmiş Diasporunun (UABD) nümayəndələri Ukrayna ordusuna 1000 qutu dərman ləvazimatları dəsti yardım edib.

UABD sədri, hüquq üzrə elmlər doktoru Hikmət Cavadov bildirib ki, xüsusi sifarişlə hazırlanmış bu dəstlər Ukraynanın Azərbaycandakı səfirliyinə təqdim olunub:

«Ukrayna səfiri Vladimir Kanevski ilə görüşdə dərman ləvazimatları ilə yanaşı, 1000 ədəd konserv və ilkin zəruri tələblərin qarşılanması üçün nəzərdə tutulan bir çox yardımlar da təhvil verildi. Biz öz Ukraynamızı, öz evimizi və öz doğma divarlarımızı qoruyuruq! Kimsə bunu silahla, kimsə bunu sözlə, kimsə də bir iş görərək edir. Bizim yardımlar bununla yekunlaşmır. Biz təcavüzkar üzərində qələbəni birlikdə əldə edəcəyik. Yaşasın Ukrayna!”

Qeyd edək ki, UABD rəhbərliyi öz təşəbbüsü ilə Bakıda keçirilən Xocalı soyqırımının anım tədbirlərində iştirak etmək üçün Ukraynanın improvizə teatr qrupu olan “Qara kvadrat” ilə 23 fevralda Bakıya gəlib. Amma 24 fevralda Rsuyanın Ukraynaya təcavüzü başlayıb. Bu səbəbdən hava məkanı da bağlandığından onlar Bakıda qalmaq məcburiyyəti ilə üzləşiblər.

Buna baxmayaraq, UABD üzvləri Ukraynaya humanitar yardımlarını və informasiya dəstəyini davam etdirirlər. 26 fevral tarixində onlar Bakıdakı Ukrayna səfirliyinin qarşısında Rusiya təcavüzünün əleyhinə aksiya təşkil ediblər. UABD fəalları Ukrayna ordusuna maddi yardımlar da edir. Son olaraq UABD-nin fəxri sədri Oqtay Əfəndiyev Ukrayna ordusunun hesabına bu günlərdə 3 milyon qrivin maddi yardım edib.