Böyük Britaniyanin və Şimali İrlandiya Birləşmiş Krallığının bir sıra şəhərlərində 8 Noyabr – Zəfər Gününə həsr olunmuş Zəfər fləşmobu keçirilib.
Birləşmiş Krallıqda fəaliyyət göstərən “Natavan Group”un təşkilatçılığı ilə London, Mançester, Aberdin, Nyukasl, Koventri, Kanterberi, Birminhem, Kembric, Nottinqem, Leverinqton və digər şəhərlərinin müxtəlif yerlərində baş tutan fləşmoblar zamanı soydaşlarımız xalqımızı Zəfər Günü münasibətilə təbrik ediblər.
Onlar Azərbaycan bayrağını dalğalandırıb, “Zəfər Günün mübarək, Azərbaycan!”, “Qarabağ Azərbaycandır!”, “Biz Azərbaycan Qəhrəmanları ilə qürur duyuruq!”, “Xarıbülbül Qarabağ Qələbəsinin rəmzidir”, “Azərbaycan Qarabağı azad edib”, “Qarabağ Bizim Qələbəmizdir!”, “Sülh Qarabağa döndü. Biz Qarabağı geri qaytardıq. #8 noyabr 2020”, “Yaşasın azad Qarabağ, azad Şuşa!” və digər şüarları nümayiş etdiriblər.
Aksiyalar zamanı Vətən uğrunda canlarından keçən şəhidlərimizin xatirəsi güllərin düzülməsi və şamların yandırılması ilə yad edilib.
İspaniyanın Barselona şəhərində isə Zəfər Günü münasibətilə konsert keçirilib.
Diasporla İş üzrə Dövlət Komitəsinin dəstəyi və Barselonadakı Azərbaycanlılar Cəmiyyətinin təşkilatçılığı ilə baş tutan tədbirdə Qarabağ müharibəsində şəhid olmuş hərbçilərin və mülki vətəndaşların xatirəsi bir dəqiqəlik sükütla yad edilib, Azərbaycanın Dövlət Himni səslənib.
Tədbiri giriş sözü ilə açan Barselonadakı Azərbaycanlılar Cəmiyyətinin sədri Kərim Kərimov qonaqları salamlayaraq, ötən müddət ərzində Cəmiyyət tərəfindən görülmüş işlər və Vətən müharibəsi zamanı göstərdiyi fəaliyyət haqqında qısa məlumat verib.
Diapsorla İş üzrə Dövlət Komitəsinin Avropa ölkələri ilə iş şöbəsinin müdir müavini Cahid Quliyev tədbir iştirakçılarını Müzəffər Ali Baş Komandan İlham Əliyevin qətiyyətli siyasəti, Silahlı Qüvvələrimizin həyata keçirdiyi uğurlu hərbi əməliyyatlar və hərbçilərimizin qəhrəmanlığı nəticəsində Azərbaycanın II Qarabağ müharibəsində əldə etdiyi Qələbənin birinci ildönümü münasibətilə təbrik edib, hazırda dünyanın müxtəlif ölkələrində Zəfər Günü ilə bağlı keçirilən tədbirlər barədə məlumat verib.
Konsert proqramı dirijor, pianoçu və bəstəkar Abuzər Manafzadə və həyat yoldaşı, vokalçı Karen Onidia Danger Manafzadənin ifasında musiqili parçaları, milli rəqslərlə davam edib.
Konsert çərçivəsində Zəfər Günü ilə bağlı fotosərgi də keçirilib.
